Dedico questa mia poesia dialettale, (con piccola morale contadina ), a tutti gli amici dei cani e delle buone intenzioni… Luciano Monti
” E chén da paiér ”
E mi zi l’aveva un chén che um pareva us ciames “Boby”,
e che ul tniva pòra bes-cia tôt e dé lighéd mal ròdi,
d’un caret drì na pajéra,
propia in faza un chémp d’spagnéra.
L’éva e pél arbof e rusgh,
pin ad pólši fina e muš,
sempre alghéd m’una cadèina,
da la sera a la matèina.
Ad magné pó nu źcuremni,
perchè ló ui dèva e rèmli,
sna muliga ad pèn dur,
cu nè vliva gnenca i surš,
e pó ui fèva un pò ad zunta,
a s’un sèç ad aqua sbiunta
Ma la dmendga e per al festi,
snò quandè cal gl’era resti,
ui tireva dó tre ośi,
che li n’era gnenca grośi,
za pluchédi e arpluchédi,
cl’éra guasi fadigh védli,
che pòr “Boby” sa cal fèmi,
ul madeva anche zó sèni
e tra sgagnli e strangalóz,
e curiva a testa basa per mašes di drì de pòz.
Una nòta ad tempurel che pareva amnses zó e mond,
tra saeti, lèmp e tòn u s’è mès a zirè in tond,
fina a quand che la cadèina la s’è źcurta sempre ad piò,
e pó dop a la matèina i l’ha trov sal gamb d’insó.
Ma ad ste fat un gnè murèla,
perché l’è pó sempre quela:
quand che un e naś sgraziéd,
gnench tla morta e vin premiéd…
Luciano Monti
