La cursa di béc

Anche stan cumè chieltr’an,
tôt la zènta in sta ti pan,
perchè ilé per San Martein,
u s’ardus un sach d’cris-cen,
l’è la festa dla Rumagna,
dóv cus bév, us rid e us magna:
pól arost , pieda e sunzézi,
per arplicis un pò al custezi.
Ma la zènta de paés,
quant cl’ariva l’óng de més e de propia che us sà,
sòt l’érch i pasérà,
tôt i spus di lé e dintorni,
per pó veda chi cl’ha al corni.
Finalmènt a la mateina,
sa che sól che schélda apeina,
i s’ardus i cuncurint,
tôt intorna a si parint
e tra quést ilé che dé,
uiè anche un cl’è stè a ti frè:
ma ló il céma Mario e sech,
megri s-cent cumè un batech,
e us dis che quand che córa,
a sla boca e suśora,
una spece ad canzuneta,
perchè isé ló e và piò in freta:
forse quest l’è sultent vóš,
che i raconta quei ch’iè zlóš,
perchè ló l’ha cumè spoša,
una bela möi franžeša,
e per quest tôt quei d’intorna,
i dis che ló l’ava al corna.
Sóta l’erch iha za tach só
un pèra d’corni a d’un bò,
che cumè che dis la storia,
al duvrà purtè la gloria,
ma quei che pasend ilé
il farà guasi scrulè.
E dé propi dla partenza iéra tôt mucid drì l’èrch,
e s’un colp spared in eria ognun d’lor iha ciap e vèrs:
tra la zènta cla urleva,
e qualcun che ui fis-cèva,
cóm un sofie a d’na scuregia,
u s’è pó smanè la végia.
A te mócc ad quei ch’curiva,
anche quei che i ne saviva,
in vuliva me traguerd,
cl’éra propia sóta l’erch,
che cal dò curnazi ad bò,
li s’muvés propia ma ló,
perchè quel l’avria dét,
che l’aveva po i curnét.
Longh al stredi i curidur,
chi tranquél, chi si dulur,
i s’è cmènz a distaché un da cl’elt per arivè,
prima ad ch’ielt ch’iéra pió indré.
Me nost Mario e puret,
i iha fat sóbti e sgambet
e isé drì e prim a roda,
l’è andè a fnì in fond la códa,
e se fié che un vniva só,
u s’è fermi ilazó,
drì un prè sór na banchina,
senz respir e se mèl d’schina,
mentre ch’ielt in fila indiéna,
iè sparì drì na pariéna.
Quant che e sech l’ha ciapè fié,
u s’è sóbti de da fè
e curénd cumè un bujaza,
l’è arivat ultmi a tla piaza
e tra urli e parulazi,
ló l’ha cminz ad alzè al brazi,
cóm che fós un gran campion,
e inveç l’éra e pió quajon
mentre propia sóra a d’ló,
cal do corni longhi ad bò
li s’è meśi a zuclè
e li n s’vliva pió farmè
e vidénd cla trimasion,
tôt la zenta in prucision,
i s’è andè a congratulè,
sa quel che propia che dé
l’éra dvént e re di béc
che pó l’era Mario e sech.
E dé dop ad che fataz,
ló zcurénd sa di ragaz,
incazed cumè un capron,
us faviva al su raśon
e tra un mocli e un porca vaca
ló l’ha dét cumè un pataca
“ An vagh pió croša ad batech,
ma ste caz d’cursa di béc…”

Luciano Monti