Una lozla la steva te scur zeta, zeta sora un fil d’erba stil cumè un cavel , che contra cla luna znina tacheda ilasò in elt dri l’arvura, e pareva d’arzent. L’era un bel piztin cla s’donduleva ma cl’arieta tevda ad zogn per aspitè me su muros.
E su cor us santiva bat dadlongh at che silenzi dla campagna indurmanteda, cumè che fos un ad chi tamburel da zugh a di burdlin; che curicin e bativa svelt cumè cla muliga ad zal de su vistid cui cvarziva apeina e su bel culazdin a punta.
Oramai la steva in pensier per e su bel luzlot che e tardeva , “ Du che sarà andè a finì che sgraziadein … l’è bela do ori che a stagh bona a fe la sbanzla sa sta fuitina…” la s’ripitiva dreinta , mentre un dop cl’el ui si chiudiva chi su do bei ucet culor dla trafuina mola , quei che i’aveva fat inamurè ma che bel gig che ades, chisà du cl’era andè a sbat al corni.
Ad un trat ui per da santì na vosa, un dul, ilè spesa una spiga d’orz che la pareva pantida da es me mond, sa cla su testa ad cavel sfilazed arvolt d’inzò e sobti la verz i’occ e la indreza a gl’urcini, la si scrola na muliga al do aloci da la guaza che a gl’aveva sora e po la s’elza in vol sora cla spiga, e per nu fes veda, la smorta che su lumicin zaltein cumè e miel de marugon: “ Isè te scur in mi vidrà nisun d’sicur …” la penseva tla su tistulina reza e scura, e po pien, pien senza fe cias, la s’infila tra al speini d’un fior d’scarpegn sfiurid… e zeta mosca, senza guasi fiatè, la docia per veda chi che fasiva chi lameint ! “ Chi mai sarà, da st’ora cl’è bela de e al lozli ormai al dorma toti ? ” , quant cumè t’un sbress na muliga ad cer l’azend e de, lia travers de sprai d’un raz ad sol, la ved qualcosa… lai s’avseina s’un vulet ligir e la guerda in bas sfrighendsi i’ucin apicicus , e at che barlom improvis trameza un ciof ad burazna stesa in te bas, la scorz na reda d’ragn cla trema tota cumè na foia ad cana me vangin d’culeina.
Alora li, la lozla, meza indurmanteda s’un ent mez vol lai va ancora piò da tached : “ Maduneina senta, chi cu iè at cla reda d’che ragnaz… na lozlaaa ! “ e at che mument la sint a cor cumè un brevid dreinta t’cal su eli stili cumè un vel ad zvola bienca, e mela e mela cativ pensier ii s’afaza dreinta tla su tistulina scavceda. Ilà sota, tot invrocc at chi fil chi lus me sulatin cu si svegia, uiè lo, se, lo e su muros c’un da nisun segn d’vita… alora lia s’un fil d’vosa spizeda de trimor lal cema, lal cema ancora e infein s’un strid cui va me cor, lai si bota sora, lal strenz sa tota la forza cla s’armidia e su amor, mentre dispereda, pianzend, lal bagna s’cal su lacrimi lostri cumè seda. Ma te sfunez per liberel da la telaragna, la pureina lan s’incorz che la s’è invrocia per sempre ma lo, me su onich amor: isè streta, che nisun ad ste mond e ad cl’elt, i la putrà mai piò divid !!!
Luciano Monti
