E mi dialèt
Um piès e mi dialèt perchè…
um arcòrda la campagna
E clà zèinta unèsta e scèta
Dla tèra du che mè a so nèd.
A vègh ancóra clà chesa granda
arampichèda só ma che grèp
e drèinta una famèia ènca piò
granda,la mi famèia,du che
us zcurèva pòch e us
lavurèva dúr!.
Am arcórd la mi nóna che,
sèmpra avstida ad nèr,
l’às cunfundèva cun e
fòm dla róla e l’onic su rumòr
l’èra quèl dla curouna de rusèri.
Am arcòrd la mi ma cl’às
dasèva tót sa gnint e pu e mi
ba che sa dó paroli e ona strèta
ad mèni e cumprèva un pèra ad bu.
Am arcòrd i mi fradèl che is
alzèva te scùr per arè zö
at chi scalancùn e mè ai
purtèva un fiasch ad aqua e sèda
Per cumbàt e sól leòn.
E mi dialèt um arporta at chi bèi
cantir ad grèn chi faséva agl’ondi
sna muliga ad vènt e pu la fèsta
per la “batdùra”e l’alegria dla
vandèima te pistè l’óva si pì
drèinta un gran tinaz!.
Infèin e mi dialèt um fà pansè
me mond ad òz clà sèmpra
Una gran prèscia e spès la
vita l’àns da gnint sa tót.
Adès,cun e prugrès, iè
andè ènca sla luna,però
arcurdèsmi bèin clè sèmpra
da la tèra che vèin fóra e pèn!.
(Renato Fattori 31dicembre 1986)
