La purcheta

Altridè de mi dutor
Un vicet s’un gran ardor…
Us presenta sa tra i dint
Un gran scroll ad azidint
Tot cla zenta cl’era ilè
Ii s’è sobti elz in pè
Per santì ma cl’umarein
Che fasiva un gran casein
Azidint ad quà e ad là
Lo e mandeva in quantità
E una dona la pureta
Sa tal men la su burseta
Lai s’avseina per calmè
Cl’umacin tot indiavlè
“ Stasì calmi e mi bon om
Che iquè colpa i n’ha nison
Totalpiò sa vlì ragnè
Me guverni uv toca urlè ! “
“ Me guverni un caz t’amaza
Al savem ch’iè tot zantaza
Ma me a ragn sa quel che at’fora
U m’ha las per piò d’un ora
Un cagnaz tot scorgh e brot
Da badei per dies minot
Te fratemp per fel ste bon
St’animel senza e padron
U m’è cost quatr’euri e piò
Per dei reta e botei zò
Da magnè la mi purcheta
Ch’eva compri da Bajata…”
E cla dona intenerida
Da cla storia apen santida
La va ilè per dei rason:
“E’ fat bein e mi brev om,
me padron quantè cl’è arvat,
aiè det cusch’avì fat,
ca iè de po da magnè
e vost pranz per e mizdè ?
Chisà com cl’è ste cuntent
Per che vost bel sentiment…”
E e vicet tot incazed:
“ Os-cia su m’ha ringrazied,
l’ha tachè a dem vargogna
com ch’ iaves purtè scalogna:
“ Al mio cane o disgraziato
La porchetta gli hai dato,
non capisci che il maiale
a un campione può far male
o gran pezzo d’animale
con quel pepe e con quel sale…
il mio Boby ha l’intestino
tutto assai delicatino
lui non è uguale a te
che ti mangi quel che c’è
la tua pancia è avvezza
a ogni tipo di mondezza
e ingozzi o suvvia
anche questa porcheria !“
“ Porcheria cla purcheta,
un n’ha las gnenca na feta
e tu chen tent deliched
anch la cherta u s’è magned
sa tre mors e mi scatoz
l’è andè a fnì tot te su goz
e un ent po s’an chev la mena
da cla vosta bis-ciulena
anche quela us magneva
se dai dint agn la caveva !”
“ Il mio Boby ben faceva
Se la mano gli mordeva
Per averlo intossicato
Con la carne che gli ha dato!”
“ A se, se o la mi ploia
Guasi, guasi um amniria voia
Da dmandev da paghè i dan
Mentre vo a fè e malan…
A mizdè per che vost chen
Solament na drugla ad pen
E un bicir de rubinet
Ad magnè a sarò custret
Mentr ma lo, me vost cagnaz
Sa tla penza e mi pranz
Che i dulur po ii ciapas
E po ad fora ul butas…”
Quant piò terd e nost vicet
Vers la chesa u s’er diret
Dri che pel du cl’era stè
A sche chen cu i’ev magnè
Che baghin dai mell udur
Se piansit tached me mur
La lusiva stesa in tera
Cla purcheta ancora intera…
Luciano Monti 25 novembre 2014