Zirudella dedicata a chi ama le tagliatelle al ragù di casa nostra…
” Tajadèli ”
Una dmendga at chésa mia,
e mi nòn e la mi zia,
iha ragnè sa cal burdèli,
per un piat ad tajadèli,
che sgond lóri a gl’era pòchi,
bagajand cumè da gl’òchi.
Un e giva che per ló
quèli a gl’éra ad dipió,
at che piat cl’aveva ló
e invece la mi zia,
cl’in basteva sgònda lia,
e che lóri propia adès,
cl’éra e mumènt da crès,
li n’putiva fè pó senza,
d’impinis tôta la pènza
e mi nòn che un vliva mèśi,
u s’è arvòlt sóbti ma neśi
e l’ha ciap i piat dal do,
per magnesli tôti ló,
ma anche lóri sal su mèni
al tireva indrì pureini:
tira té e tira mé
e i du piat iè pó vulè,
sa tôt quanti al tajadèli,
sparguiun sal madunèli,
tra bucazi e pó biastimi
e mi nòn cal tajadlini:
a la fin i gl’ha dvù dè
me mi chén che u gl’ha slampè…
Luciano Monti
